七一好危險，唔適合行街睇戲，無謂俾狗追；七一冇嘢值得慶祝，唔好開電視機，都係上山強身健體，發吓白日夢。一年一度行山跑步盛事「尖鼻咀至尖沙咀郊遊活動」，今年好似冇人做搞手，不過如果想自己行一次都無妨，自己上網搵個GPX，約定兩三個知己，跟住嚟行；而大叔今年腳痛，唯有睇返舊相，緬懷一下當年嘅開心回憶。
話說喺某年某月某日，集齊幾位大叔，興高采烈咁玩咗呢段路，我哋請到個車手載我哋一程，嚟到起點尖鼻咀，趁朝頭早冇咁熱就準備起行。已經一段時間冇嚟過呢邊，大叔驚覺原來北面已經起咗好多高樓大廈，感覺到虛火越燒越猛，本土生活壓力越來越大，唯有嚟多啲大自然，觀察野生動物，學習究竟點樣適者生存、保留有用身軀，將來繼續將公義良知世代相傳。
今次旅程kill標係一大重點，所以我哋都由上龜山開始作為出發點，然後就順勢沿邊境路向天水圍進發，期間因為落過雨，所以都要避過水氹同爛泥，重臨漁塘濕地，間中見到唔同種類嘅水鳥，回想起當年學習觀鳥嘅日子，真係好有趣，智識仍然終身受用。
穿過一排村屋，就會進入市區，首先嚟到橫洲工業區，繼續南下，就會到達元朗。太陽一出，就已經熱到飛起，嗱嗱臨入廁所，洗個面、降吓溫，再買枝水特補充一吓。期間經過好出名嘅南邊圍，好彩唔見有白衫人喺村口恭候，不過都係早走為妙，無謂比藤條侍候，因為呢度係冇執法人員巡邏嘅地方。
我哋一班幾百歲嘅大叔，一路向西，沿着錦田公路，邊走邊講笑，不知不覺間，就嚟到石崗機場外圍，然後再到八鄉，見唔到三粒花，就決定上去雷公田之前，嚟個大補給；呢一段路，好彩有地膽大叔帶路，如果唔係，一定蕩失路。
終於可以轉返行山路，沿著山明水秀嘅甲龍古道，影完大叔的愛嘅劇照，就可以慢慢到達荃錦公路；而嚟到連姐個舖頭，唔係唔幫襯一下同埋打卡吓話。歡樂時光好快就完，避無可避咁大叔沿著大帽山道，一路走上白波波。雖然大家都係麻甩佬，但係大家著住件隊衫，都真係好吸睛，如果唔影多幾張靚相，真係對唔住自己。
不過大帽山成日出現天有不測之風雲，剛才陽光普照，下一秒就變成大雨滂沱；幾位大叔又要即刻九秒九狗衝落四方亭避雨。大家都順住個地心吸力，快腳咁走到落鉛礦坳，再嚟個小休，跟著就拾級而上草山喇！其實唔係諗住要kill標嘅話，行城門林道都可以落返城門燒烤場；不過既然最後大家嘅選擇都係鍾意kill標，就要行埋上針山；不過竟然有兩位帶頭嘅大叔，傾得興高采烈，錯過路口走過籠，白白要行返上斜路兼加操兩公里啊！所以大家嚟到分岔口，真係要打醒十二分精神，唔該唔好一錯再錯呀！
原本以為會逆走麥徑，原來係要上孖指徑，大師兄疏於練習，故此上山有啲窄窄地，我哋幾個師兄弟隊友，唯有半推半就、前拉後推咁幫佢上山頂。今次亦都係大叔第一次上呢個山，原來風景角度都耳目一新，落山之後可以折返金山路，遇上難得一見嘅飛水瀑布，然後再出返大埔公路。途中有一架貨Van，司機帶埋一大堆麵包皮，拎嚟餵野豬同馬騮，搞到烏煙瘴氣，養成啲野生動物以後只係會向遊人乞求食物，甚至乎會變本加厲攻擊途人，實在係好心做壞事。
喺個巴士站，有隻善良嘅馬騮已經喺度等緊嘢食，不過我哋冇理佢，一齊行返上天橋過對面馬路，上琵琶山打卡先，跟住剷林落返大埔公路，就真係有驚喜，覺得好好玩啦！其實好多水利設施同埋公路建築，都有超過100年歷史，以前英國人真係留咗好多好嘢比香港人；不過估唔到，而家唔使等10年，就可以將所有好嘢毁於一旦。跟著落嚟嘅日子，我哋都係要乖乖咁上返行人路，跑到下一個景點嘉頓山；之前試路喺呢段路仆過街，不過今次一定唔輸得，唔會再衰第二次。打完呢個卡，已經入黑，我哋都開著電話燈，落返市區，繼續剩低嘅幾公里路線。
由深水埗去尖沙咀，可以有好多條路線，我哋試路嘅時候，選擇咗最外圍嘅一條路，想盡量避開啲燈位同人群；雖然遠咗，但係跑起上嚟比較暢通無阻。其實九龍真係好細，我哋話咁快，就穿過旺角、油麻地、佐敦，然後到達尖沙咀。我哋繼續閃避人潮，轉咗入海港城下面嘅港威大道，經過五枝旗杆，同埋尖沙咀天星碼頭，順利到達尖沙咀鐘樓終點。
大家靜咗一陣，一齊見證香港島嘅夜景，大叔都好有感觸，不約而同感嘆一口氣，其實「香港真係好L靚」！香港人要贏！邊個邊個就一定要輸喇！
終於成就解鎖尖to尖，其實呢一段路，最緊要搵多幾個伴同邊度有補給位置，記得定時飲水食飽；如果嚟緊想喺七一運動一下嘅跑友，相信自己實力，你/妳一定可以完成。
此文章謹為本大叔囉嗦之作，與其他人士、機構及活動立場無關。
幫手叫多啲人入嚟呀！ I want you to follow my page on MeWe 囉嗦大叔
long-winded uncle https://mewe.com/p/%E5%9B%89%E5%97%A6%E5%A4%A7%E5%8F%94long-windeduncle
留言
張貼留言