2023倫敦馬拉松(八)

最近大叔冇晒聲氣,事關「人衰行路打倒褪」,做極復健、針灸,傷患仍是不能夠斷尾,自然懷疑係咪身體出現其他問題呢?於是,就預約榮總專科醫生,檢查一下其他身體狀況。


台灣嘅醫療,眾所周知「快、靚、正」,程序非常簡單:-到達醫院之後,首先新症病人要預先填表,登記健保卡,然後就可以上專科樓層,做完自助身體檢查之後,可以响醫生門口插卡報到;如果輪候號碼未到,真係好快就可以睇醫生,否則,就要由隊尾繼續排。



台灣醫生非常有禮、有人情味,都願意解答病人疑問;開藥之後,護士就會將藥單、收費單、覆診證明或再附加其他檢查預約單交俾病人;自己去另一個部門做抽血同驗尿,最後交錢同攞藥;整個睇病過程大約個幾鐘頭,以公營醫院嚟講,真係非常快手。



至於身體檢查,病人都會跟住醫院「既定程序」按部就班完成,同樣都係响指定日子(不出一個禮拜)用健保卡報到、等候、檢查、完成,一樣都係個多鐘頭就禮成。人到中年,難免多出入醫院;唯有養成運動習慣、補養身體、調理好生心理狀況,就算踏入熟齡,人生仍然活得優雅。



最後,講返大叔失蹤原因,話說食完幾次肌肉鬆弛同止痛藥之後,第二朝出街竟然暈倒捷運車站,幸好得職員幫忙,將大叔送往附近醫院急症室檢查,休養一陣之後,醫生都話冇大礙,於是乎就趕住出院,整個過程亦只不過兩小時,唔使同人逼。



返屋企睇返啲藥,原來啲副作用好勁,又眼瞓、又頭暈,醫生有提過,估唔到真係咁犀利;所以停咗食呢兩隻藥,好快就冇事。覆診時候,醫生就轉咗俾肌肉軟膏;另外,要檢查嘅部位亦冇大問題,可以專注肌肉運動治療喇。


如果下次想昏迷咁瞓到天昏地暗嘅話,先再攞返啲藥嚟試吓。至於倫馬跑步訓練計劃,又仍然處於膠著狀態囉!所以,大叔真係好需要接收大家嘅正能量啊!因為齊心,就一定會事成;只要多啲人一齊保持正念,結果就會向住好嘅方向發展。

留言

張貼留言

熱門文章