2023倫敦馬拉松(十二)

下一組訓練,大叔約咗山賽隊友及十卜team之前同最信賴嘅教授,話想食飯前簡單行吓獅子山,所以搵佢計劃一條好路線,然後就冇再深究過;到最後出發當日,隊友先問大家有冇帶手套,細心一睇,原來中咗伏,果然山界真係冇朋友,包括你最可信嘅蘇眉buddy呢!而最吊詭嘅係,計劃路線條友話未行過條路、又唔嚟一齊行,只係嚟食晚飯,大家講句公道說話吖!




無論如何,一行六人準時集合兼出發,而我哋亦好尊重大會決定,維持沿用原定路線。從黃大仙廟旁邊起步,途經黃大仙上邨、竹園南邨,到達鵬程苑對面條山徑入口,開展未知嘅探索。一開始都係一啲行山人士開發嘅晨運徑,可以見到山友飲茶嘅架步。繼續上行,山路越嚟越崎嶇,碎石浮沙數之不盡,原來已經踏上雄獅拉矢脊,而估算重量達過千公噸嘅雄獅拉矢石就在眼前。其實「拉矢」係咪廣東話「痾屎」嘅意思呢?另外,呢粒大石,係咪獅子痾出嚟其中一粒最大嘅屎呢?(如果山友响獅子山上對住九龍方向下望,就仍然會見到呢粒大石㗎喇。)



我哋繼續往上爬,此時手套真係大派用場,因為唔用四肢落地嘅方法,係冇可能走到上獅頂嘅!期間,我哋都經過大大小小嘅巨石(獅子屎?),企响旁邊影相,無可避免出現畏高尿急嘅感覺。當向上望著獅頭嘅時候,大家都疑惑到底有邊條路可以上到去呢?原來,山路正正隱藏喺樹林中間,靠近獅肚大坡板嘅左手邊;最後幾經波折,全部人都順利嚟到熟悉嘅獅身,可以沿著梯級繼續登上獅頭。所以,「獅子山精神」笨唔係浪得虛名,係代表著「同舟人 誓相隨 無畏更無懼」㗎!






此時,大叔靜靜地响獅頭坐禪,閉上眼睛,聆聽疾風同雀鳥聲;繼而打開眼,觀賞香江既方便又獨有嘅360環廻風景,無論港島、九龍、新界甚至離島,都能夠盡收眼簾。坐多一會,大家都帶著回程嘅心態落山,誰不知原來好戲先在後頭;由帶頭隊友引領之下,大夥兒嚟到三叉徑落山入口,正是UTMT上麥五嘅一小段比賽路線;大家拉著尼龍繩,好不容易終於接上大龍徑。原本大家都冇投訴,因為心諗終於落山準備去食飯嘛!但後來又再搵路走上小龍徑嘅時候,真正嘅挑戰依家先至正式開始;觀察所得,大家相信呢條路平時除咗野豬之外,應該冇乜人行;雜草叢生之下,的確𠝹損咗大叔嘅美腿。



嚟到路程尾聲,天亦開始陰沉,如果再搵唔到落山出口,恐怕要開頭燈逃生。好彩一行六人都係經驗老到,大家齊心穿過畢直樹林,然後玩完最後一道瀡滑梯斜坡之後,大隊終於到達引水道,亦即係衛奕信徑,成功安全回歸文明之地;之後仲有時間走到梳洗地點,換個靚裝先去食飯。




今次真係多謝咁多位隊友相陪,大叔先可以嚟個特種訓練,當然更要多謝計劃呢條路段嘅放飛機隊友啦!

留言

熱門文章