2023倫敦馬拉松(九)

難得返鄉下探親,除咗見吓親朋戚友、舊同事、好隊友之外,亦當然要順道緬懷一下以往走過嘅地方,執返掉底咗嘅腳毛。今日,就沿住維港,由金鐘走到西灣河,嘗試重拾雙腳踏步嘅節奏、身體與呼吸嘅協調、聆聽頑固傷患嘅投訴,更重要嘅係,畀機會大叔再一次欣賞香港、記錄這遍土地嘅特色、變化和對香港人嘅回憶。

大叔首先嚟到夏愨道天橋,路過嘅人都成為籠中鳥,可謂插翼難飛;因為香港差唔多所有天橋都安裝咗鐵絲網,用嚟阻擋有形嘅物件,但並唔能夠禁止無形嘅思想,問題並冇解決過。




嚟到灣仔一帶,遠眺對岸光明嘅九龍半島,回頭再睇返黑暗剪影吓嘅港島西,好有一同歸西嘅感覺。雖然海濱已經美化成適合遊人口味嘅公園,但都只不過係粉飾太平嘅形象工程,其實可能响地下收埋咗好多垃圾,「眼不見為乾淨」!



再繼續向東行,接近紅隧口,被兩塊放响一齊嘅大廣告嚇一跳;用國語拼音大概

係「腥梘賤賊全年沾污」,旁邊就話「你今日畀人呃咗未」,真係互相輝影、相映成趣。



然後好快又嚟到維園對出嘅海濱長廊,呢度擺放好多打咭道具,但係都已經再冇生氣㗎喇;反而,大叔想試吓咩叫做「避風塘炒蟹」,坐喺舢舨上搖吓搖吓咁食飯,會係咩滋味呢?



轉入內街,穿過酒店、街市、舊建築,到達北角碼頭;大叔見到有生物蠕動並且流著血,一位大大叔向著我舉手、笑笑口、好自豪咁對我講「我釣㗎!」,大叔心諗:「香港又多一條生命被犧牲喇!」



再行過一啲,就係「大」到無輪嘅寵物公園,狗狗不分大細,喺石屎地上奔跑,原來動物走在草地上唔係理所當然㗎!最可惜係佢哋並唔知情,永遠唔識爭取,只可以啞忍接受。


待續… …

留言

熱門文章