為咗增加路跑腳感，其實大叔亦約咗另外幾位不同代表，一齊歷遊香港地。
首先，係同舊同事跑友喺運動場操吓圈，互相分享呢幾年嚟別離後嘅生活點滴、依家想法同展望將來。跑喺跑道之上，原來自己已經冇咗往日拼搏嘅精神，反而多咗一份身體要緊嘅顧慮。不過，能夠見到仍然有咁多素人同高手練習跑步，睇見以前嘅大叔，真正嘅手足同行係非常重要。
另一晚，大叔又約咗超級越洋應援隊員，一齊hea遊中環-堅城-灣仔海濱，比較一下同幾年前環島時嘅模樣，到底有冇咩分別。兩岸建築物仍然係五光十色、公園增添唔少玩耍設施，不過會講廣東話嘅人就少咗好多。其實對談之間，不期然就會產生灰嘅感覺，與其時間都係向前走停唔到嘅話，倒不如多啲向好嘅方向諗吓，樂觀應對、處之泰然，你睇吓「對面咪係鄉下富士山囉！」
仲有一晚，搵嚟相識二十幾年好老朋友，又係熟齡先嚟跑全馬嘅人生勝利組；凡事有上天眷顧，依家生活無太大擔憂、無大起大跌大風浪、心境仍然保持開朗平和嘅香港人，已經算係大贏家，夫復何求呢！將軍澳新橋喺夜晚有燈光照耀，成為咗打卡景點，遲吓可以考慮大時大節舉行煙花匯演，就如台灣淡水一樣，為區內市民提供多一項方便娛樂選擇（其實由九龍東去元朗國睇煙花又真係好遠㗎！）回程見到好多共享單車阻街，因為冇固定泊位，搞咗咁多年都係為做而做；相對台灣或其他外國勢力就真係做得有聲有色，點解？正苦唔同囉！
探親行程接近尾聲，關於備戰倫馬，大叔從四方八面收集不同資訊，實在獲益良多，記錄如下：-
「倫馬限時八個鐘，一於放鬆心情玩盡佢」
「肌肉繃緊，需要按摩師嚟個深層推拿，再自己做多啲肌肉伸展同強化運動」
網上圖片只作參考
關於跑步練習模式，就有以下選項：-
「跑、行、跑、行、… … 無傷無痛完賽大法」
「成效顯注，勤練斜坡」
「時間緊迫，練習interval，再tempo」
「剛剛證實嘅成功例子，俾個建議大叔如下」
大叔會逐一嘗試，搵個最適合自己嘅訓練方案，亦會應承大家「平安過終點」。
最後，大家都要「保持正念思維、定立人生新目標、學習新事物、推動自己做好榜樣」。香港人，共勉之。
留言
張貼留言