2023倫敦馬拉松（十一）

難得返嚟腥梘，當然想體驗一下郊野公園嘅氣息，順便做埋cross training，予訓練于娛樂。所以約咗以往唔同單位嘅隊友，一齊行吓以前走過嘅路，回顧吓以前、緬懷吓過去；又展望將來、鼓勵吓大家。 

今次搵嚟馬鞍山代表，重臨我哋嘅訓練基地，一邊行一邊有講有笑；只要目標清晰，縱使天各一方，點吓頭問候完，大家都會仲有好多嘢想分享，果然「天變地變情不變」啊！ 我哋主要嘅目的地係大金鐘同昂坪，以前大叔都曾經帶同愛犬一齊登頂，讓汪星人眼界大開，同其他犬朋友都多個話題嘛！其實人在尖頂，就能夠吸收大地靈氣。我哋搵個位置，面對西貢海，做起坐禪；一齊專注呼吸，身邊噪音頓成過客；心存正念，開放心屝，隨意接收上天訊息，心情變得豁達開朗，即能忘卻煩憂；雖然前路可能仍覺迷惘，但相信撥開雲霧，總會尋找到出路。

對於我哋幾個身經百戰嘅山友，所有困難、險阻，都曾經克服，亦有能力克服，更加相信將來都一定可以克服。 前往石林之前嘅山路，已經開發成石級小徑，大自然成長嘅痕跡，漸漸被人工化工程取代，希望所有「完善制度」都從未發生，讓所有動植物都能夠按其天然生存條件，自由自在地健康安全成長。

以前受到火災燒毁嘅山頭，依家都綠草如茵；山下居民暫時仍能夠居者有其屋，不過聽聞有大地產商蠢蠢欲動、大興土木，似乎馬鞍山又要再一次面對環境破壞嘅恐懼同挑戰。 最後，我哋嚟到礦工Cafe，唔使開礦，都可以品嘗礦石cookie，連同甘香嘅冰釀咖啡、馬鞍山全景模式，實在好chill好自在，真係好想永遠擁有咁樣嘅居住環境啊！ 

之前講過：「人如果冇夢想，就會變成一條鹹魚。」大叔想做一條活生生嘅魚，因為可以隨時隨地游返嚟香港嘛！