2023倫敦馬拉松（十）

 

… … 續

雖然沿路唔係山旮旯，但係如果想走得快，避開人潮都要有技巧，追返俾香港人更快嘅步伐，仲要趁著綠公仔閃動時，快速橫過馬路，唔需要浪費等候交通燈嘅時間。所以，人係好容易隨著大環境而改變，响台灣一年多學習、接受、實行慢活；但回港幾天，已經徹底融入香港地緊張、忙碌、高效率嘅生活模式。人學會變通唔係壞事，但記得唔好忘本，每個人都應該思考吓人生價值觀，「為何而生、為何而活」，好好堅持自己不死信念，就唔會咁容易被大量嘅軟性壞思想熏陶。好多朋友同大叔講，香港冇新聞、冇電視節目，已經好耐唔睇香港報紙、睇香港電視台，電台都只係聽一間嘅其中一個節目，上網都係睇外國片、海外消息，咁樣做個人唔會有咁多負面情緒，剩返更多時間做自己開心、更加有意義嘅事。

Anyway，講返今次未完嘅行程，北角同鰂魚涌交界，其實有座水務署大樓，牆上壁畫繪畫咗港九新界各個水塘，原來大叔都曾經喺跑步時經過，身為真香港人，真感覺良好兼好興奮，所以推介俾大家去打卡一番。

下一個景點，大家應該諗唔到嘅，就係香港殯儀館（俗稱大酒店），英文係 (Funeral Home)。人死後去咗邊度？天堂還是地獄？轉世輪迴還是飛往外星？無論如何，到時就係去咗另一個家，重新過活。所以靈魂嚟到Funeral Home真係無有好怕，萬事應該感到平安，再冇憤怒、怨恨、妒忌、沮喪種種嘅負面感受。因為人生在世匆匆幾十年，最終臭皮囊會腐朽、骨頭燒成灰燼，但無形思想不滅，跟隨靈魂一齊嚟到新天新地。在地球之上，自己曾經所做過嘅一切，上天一早已經睇在眼裡，點樣安排亦應該欣然接受，冇得投訴。所以，眼見好多人仍然走惡魔嘅道路，呢啲係佢哋嘅選擇，算L把啦！只要自己做個有用嘅人、做個好樣版，按照「志同道合、物以類聚」原則，大家都可以喺自己相信嘅家相見。

輕輕鬆鬆發完噏風，終於返到老家探望雙親，大叔霎時變回老人家眼中，永遠長唔大嘅孩子身份，永遠擁有純潔無邪的心。